حەمیدڕەزا فوولادگەر، ئەندامی مەجلیسی شۆڕای ئیسلامی دانی بە بێكاریی سەروو سەدی ٥٠ی لاوان دانا.
ئەم ئەندامەی كۆمیسیۆنی پیشەسازییەكانی مەجلیس بە نیگەرانییەوە گوتی: نرخی بێكاریی بە شێوەی ڕەسمی نزیكەی سەدی ١١ ڕاگەیەندراوە، بەم حاڵەش بەپێی كۆمەڵێك لە ئامارە ناڕەسمییەكان نرخی بێكاری لە سەدی ٢١ زیاترە، بەڵام ئەوەی كە لەم ئامارەدا زیاتر جێگەی نیگەرانییە بێكاریی سەرووی سەدی ٥٠ی لاوانە ،كە ئەوەش بۆخۆی قەیرانێكی جیددییە.
ناوبراو ڕۆژی یەكشەممە ٦ی پووشپەڕ لە لێدوانێكدا بۆ هەواڵدەریی فارس سەر بە سپای پاسداران گوتی: ڕووحانی تەنیا ئاماژە بە ئاماری پێکهێنانی هەلی كاری دەکاو چاوپۆشی لە لایەنەكەی دیكەی ئەم بابەتە دەکا، كە وەدەرنانی هێزی كار لە یەكە پیشەسازییەكانەو ئەگەر بمانهەوێ بە وردی ئەم ئامارە ڕابگەیەنین، لە ماوەی سێ ساڵی ڕابردوودا ئاستی گەشەی هەلی كاری لەم وڵاتە سفر بووە؛ بە واتایەکی دیکە هیچ هەلێکی کاریی نوێ دروست نەبوەو بێکاری هەر لە جێی خۆیەتی.
فەرهاد بەشیری، ئەندامێكی دیكەی مەجلیسیش لەو پێوەندییەدا گوتی: دروشمی ڕووحانی لە كاتی هەڵبژاردنەكاندا مەسەلەی دانووستانە ناوكی بوو و ئەو لەم ڕێگەوە بە شوێن چارەسەری گرفتەكانی كۆمەڵگادا دەگەڕا.
بەشیری وێڕای ئاماژە بەم بابەتە كە رێککەوتنی ئەتومی هیچ دەسكەوتێكی بۆ ئێران نەبووەو تەنانەت پەرەی بە هەندێ گرفو قەیرانی وەك ڕكوودو بێكاریش داوە، گوتی: هاوردەی سەرەڕۆیانەی كاڵا و شتوومەك كاریگەرییەكی بەرچاوی لەسەر بازاڕی نێوخۆیی ئەم وڵاتە داناوەو شكستی ئابووریی نێوخۆیی زۆر قووڵتر كردۆتەوە.