حەسەن نەسروڵڵا، ڕێبەری حیزبوڵڵای لوبنان دەڵێ: گەمارۆكانی ئامریكا بە دژی حیزبوڵڵای لوبنان هیچ كاریگەرییەكیان لەسەر دابینكرانی سەرچاوە ماڵییەكانی ئەم ڕێكخراوە سیاسی ـ نیزامییە نابێ، چونكی سەرچاوە ماڵییەكانی ئەم ڕێكخراوە ڕاستەوخۆ لە لایەن ئێرانەوە دابین دەكرێ.
حەسەن نەسروڵڵا ئیدیعا دەکا کە حیزبوڵڵا چاوی لە دەستی بانكەكان نییە.
حەسەن نەسروڵڵا لە درێژەدا گوتوویەتی گەمارۆكانی ئامریكا نە هیچ زیانێک بە ئێمە دەگەیەن و نە كاریگەریشیان لەسەر سەرچاوە ماڵییەكانمان هەیە، چونكی تا ئەم كاتەی كە ئێران پووڵی هەیە، ئێمەش بێ پووڵ نامێنین.
شایانی باسە ناوی حیزبوڵڵای لوبنان لە لایەن ئامریكاوە خراوەتە لیستەی گرووپە تێرۆریستییەكانەوەو، بەشێك لە گەمارۆكانی ئامریكا بە دژی ئێرانیش كە بە هۆی پشتیوانی كردن لە تێرۆریسم جێبەجێ دەكرێن، لەگەڵ ڕێككەوتنامەی ناوكی هەڵنەگیران‌و لەجێی خۆیانن.
