لە ماوەی چەند ڕۆژی ڕابردوودا زنجیرەیەك مانگرتنو کۆبوونەوە ناڕەزایەتیی دەربڕین لە شارەكانی شائاباد، بێستوون، كرماشان، كەنگاوەر و هەرسین بەڕێوەچووە.
دەستەیەك لە كرێكارانی شیركەتی لوولەسازیی غەرب بۆ ناڕەزایەتی دەربڕین بە پێنەدرانی مووچەی ٤ مانگیان لە بەردەم ئەم كارخانەیە كۆبوونەوەو داوای مافەكانی خۆیان كرد.
سەر لە بەیانیی ڕۆژی شەممە 5ی پووشپەڕ، كۆمەڵێك لە كرێكارانی شیركەتی “غەرب شیمی” لە شاری بێستوون، بۆ ناڕەزایەتیدەربڕین سەبارەت بە پێنەدرانی مووچەی مانگی جۆزەردانو حەقی ئیزافەكارییان لە شوێنی ئەم كارخانەیە كۆ بوونەوەو داوای مووچەی دواكەوتووی خۆیان كرد.
هەروەها كۆمەڵێك لە پێرسۆنێلی شیركەتی “پارس تەحریر”یش بۆ ناڕەزایەتییدەربڕین بە بە وەرنەگرتنی ساڵێک حەقی “سەنەواتی شوغڵی” و پاداشی ساڵانە و هەروەها حەقی بیمەی ١ ساڵی ڕابردووی خۆیانو كەمیی مووچەكانیان لە بەردەم ئەم شیركەتە، لە شارۆچكەی سەنعەتیی فەرامانی كرماشان خۆپێشاندانێكیان وەڕێ خست.
لە لایەكی دیكەشەوە، بەیانیی ڕۆژی شەممە ٥ی پووشپەڕ، كۆمەڵێك لە دانیشتووانی شارۆچكەی زەفەر لە كرماشان بە مەبەستی ناڕەزایەتیی دەربڕین بە لابرانی مریشك لە سەبەتەی كاڵا لە لایەن فرۆشگای ڕیفاە لەم شارۆچكەیە، لە بەردەم ئەم فرۆشگایە كۆبوونەوە. بڕیار وابوو كە لە ماوەی مانگی ڕەمەزاندا سەبەتەی كاڵا بە بنەماڵە كەمداهاتەكان بدرێو، یەكێك لەم كاڵایانەش مریشك بووە. بە قسەی ئەم خەڵكە ناڕازییە، كاربەدەستانی حكوومەت لە فرۆشگای تەعاونی مریشكیان لە سەبەتەكان كەم كردۆتەوە تا لە بازاڕ بە شێوەی ئازادو بە نرخی چەند بەرانبەر گرانتر بە خەڵكی بفرۆشنەوە.
لە لایەكی دیكەوە كۆمەڵێك لە دایكو باوكانی قوتابییانی قوتابخانەی “تەها” لە شارۆچكەی كارمەندانی كرماشان بۆ نیشاندانی بێزاریی خۆیان ئەستاندنی پووڵ لە لایەن كاربەدەستانی حكوومەت بە بیانووی جۆراوجۆر لە كاتی ناونووس كردنی منداڵەكانیاندا، كۆبوونەوەیەكی ناڕەزایەتییان پێكهێنا.
كاربەدەستانی قوتابخانەكان بە تەمان جگە لە شەهریەی ١٠٠ هەزار تمەنی كە لە دایكو باوكی قوتابییەكانی دەستێنن، بڕی ٣٠٠ هەزار تمەنی دیكەشیان بە شێوەی نەغد لێ بستێننو هەرشەشەیان لێ كردوون كە ئەگەر بنەماڵەكان ئەم پووڵەیان پێ نەدەن، منداڵەكانیان ناونووس ناکرێن.
لە كەنگاوەریش كۆمەڵێك لە پەرستارەكانی نەخۆشخانەی چەمران، كە لە دواکەوتنی مووچەی ٢ مانگو حەقدەستی ٦ مانگ كارانەی خۆیان وەزاڵە هاتبوون، لە بەردەم ئەم نەخۆشخانەیە لە بڵواری عێراقی كۆ بوونەوەو داوای پێدانی مووچە کرد.
كۆمەڵێك لە پێرسۆنێلی گرێبەستی شارەداریی “هەرسین”یش، بۆ ناڕەزایەتی دەربڕین لە بابەت پێ ەدرانی مووچەی مانگی جۆزەردان و ئیزافەكاریی ٣ مانگی خۆیان، لە بەردەم شاەداریی هەرسین كۆبوونەوەو داوای مافەكانی خۆیان كرد.