تەقینەوەی مین لە شاری گەیلانی ڕۆژاوا سەر بە پارێزگای كرماشان بوو بە هۆی كوژرانی كەسێك.
بەپێی ڕاپۆرتی هەواڵدەریی مێهر، لە نوێترین حاڵەتی تەقینەوەی میندا كوڕێكی لاو بوو بە قوربانیو بەو هۆیە گیانی لە دەستدا.
تەقنەوەی مین لە گەیلانی ڕۆژاوا لە كرماشان لە حاڵێك دایە كە ڕۆژی چوارشەممەش “سادق چابوك” و “ڕەحیم ئازەرپەیكان” لە كارمەندانی ناوەندی هەڵگرتنەوەی مین لە کاتی کار لە ناوچە مینڕێژكراوەكانی دێهلۆران لە پارێزگای ئیلامدا بەهۆی تەقینەوەی مین بریندار بوون.
لە ڕووداوێكی دیكەشدا كە دیارە چاوەڕواننەكراویش نییە، ئێوارەی ڕۆژی چوارشەممە لە كاتی هەڵکۆڵینو جەدوەل دانان لەلایەن كرێكارانی شارەداریی سەقز لە شەقامی شیرازی، لە كۆڵانی گوڵستانی 7، مینێك لە ژێر عەرزدا دۆزرایەوە.
شایانی باسە پاش تێپەڕینی ٢٨ ساڵ بەسەر كۆتایی شەڕی نێوان ئێرانو عێراق تا ئێستاش ١٦ میلیۆن مین لە ژێر خاکی كوردستاندا بەجێ ماوە و ساڵانە نزیكەی ٢٠٠ كەس بەهۆی تەقینەوەی مین دەبنە قوربانی، بەڵام سەرەڕای ئەوەش ڕەوتی هەڵگرتنەوەی مین لە ناوچە بە مین تەنراوەكانی كوردستان زۆر بە خاوی دەچێتە پێشێو لە زۆربەی ناوچەكان ئەم ڕەوتە هەر بە یەكجاری ڕاوەستاوە.
شایانی باسە لە ساڵی ڕابردوودا تەنیا لە شاری قەسری شیرین بەهۆی ٣٥ حاڵەتی تەقینەوەی مینی بەجێماوی سەردەمی شەڕ ٦ كەس كوژرانو ٣١ كەسیش بریندار بوون.