ماوەی ١٠ ساڵ بەسەر جێبەجێ كرانی پرۆژەی پشكەكانی عەداڵەتدا تێ دەپەڕێ، بەڵام تا ئێستاش خاوەنە ئەسڵییەکانی ئەم پشكانە کە خەڵک بن، لە قازانج و ئیمتیازەكانی ئەم پرۆژەیە بێبەشن.
نوێنەرێكی مەجلیس دەڵێ: بەڕێوەبردنی پرۆژەی پشكەكانی عەداڵەت لە بەر دەستی مافیایەکی نێو دەسەڵات دایە.
نیزییک بە ١٠ ساڵ لەمەوبەر دەوڵەتی مەحموود ئەحمەدی نژاد ڕایگەیاند بە مەبەستی دابەشكردنی عادڵانەی سەروەت و سامان، بەشێك لە پشكەكانی دەوڵەت لە شیركەتو كارخانەكان بۆ ئەم کەسانە تەرخان دەكا كە داهاتییان كەمە. بەڵام ئێستا سەرەڕای ئەم هەموو هەوراز و نشێوەی كە ئەم پرۆژەیە لە ماوەی ١٠ ساڵی ڕابردوودا بڕیویەتی، سەرۆكی كۆمیسیۆنی ئابووریی مەجلیسی شوورای ئیسلامی دەڵێ ڕەوتێكی مافیایی ئەم پشكانە ئیدارە دەكا.
محەممەدڕەزا ئیبراهمی دەڵێ ساڵی ٨٥ دەوڵەت كاغەزێكی بە ناوی سەهامی عەداڵەت بە خەڵك دا، بەڵام ئەم كوتە كاغەزە نە هیچ تایبەتمەندییەكی هەیەو نە هیچ قازانجێكیشی لێ شین بۆتەوە.
ناوبراو وێڕای ئاماژە بەم بابەتە كە ڕەوتێكی مافیایی ئەم پشكانە ئیدارە دەكاو لەمپەری بەردەم بەڕێوەچوونی كۆڕی گشتیی شیركەتەكانی ژێر دەسەڵاتی سەهامی عیداڵەتیش هەر ئەم ڕەوتەیە، داوای لە دەوڵەت كردوە كە بارودۆخی خۆی لەگەڵ ئەم مافیایە یەكلا بكاتەوەو كۆڕێکی گشتی شیركەتەكانی ئەم پرۆژەیە بەڕێوە ببا.
سەرۆكی كۆمیسیۆنی ئابووریی مەجلیس بەهای پشكەكانی عەداڵەتی ٩٥ هەزار میلیارد تمەن ڕاگەیاندو گوتی بەڕێوەبردنی ئەم پشكانە هەروا لە بەر دەستی ڕێكخراوە دەوڵەتییەكان دایەو خاوەنانی ئەم پشكانە ناتوانن بە هیچ شێوەیەك خاوەندارەتیی پشكەكەیان بۆ كەسێكی دیكە بگوازنەوە، تەنانەت هێندێك لەم خاوەن پشكانە لە ژیان دا نەماونو لە ماوەی ژیانیشیاندا هیچ قازانجێكیان لێ نەدی.
دەوڵەتی ئێران مانگی بانەمەڕی ساڵی ٩٢ ڕایگەیاند كە كەس بۆی نییە باس لە كڕێنو فرۆشتنی پشكەكانی عەداڵەت بكا. بەپێی بڕیارنامەی دەوڵەت، خاوەنانی پشكەكانی عەداڵەت دەتوانن لە تالارە فەرابورسەكان مامەڵەی پشكەكانی خۆیان بكەن، بەڵام پوورئیبراهیمی ڕایگەیاندوە دەوڵەت كە یەک لە سێی پشكەكانی عەداڵەتی لە بەر دەست دایە، ڕێگری لە قازانجكردنی خەڵك لەم پشكانە كردوە. ناوبراو داوای لە دەوڵەت كردووە كە پشكی خۆی لەم بەشە جیا بكاتەوە تا خەڵكی ئاساییش قازانجی خۆیان لەم پشكانە دەست بكەوێ.
پوورئیبراهیمی دوو ساڵ لەمەوبەریش ڕایگەیاندبوو كە بەڕێوەبردنی سەهامی عەداڵەت لەبەر دەستی باندێكی مافیای ٢٥٠ كەسی دایە كە ڕێگەی هیچ چەشنە هەوڵێك لەم بەشەدا بە كەس نادەن.
