محەممەدجەواد زەریف، وەزیری دەرەوەی ئێران، كە لە چوارچێوەی زنجیرە سەردانێكی ئورووپایی بۆ وڵاتانی فەرانسەو هولەند، گوتی كێشە بانكییەكانی نێوان ئێرانو فەرانسە چارەسەر نەكراون.
زەریف که لە كۆمیسیۆنی كاروباری دەرەوەو بەرگریی مەجلیسی سەنای فەرانسە قسهی دهکرد، بۆ جارێكی دیكە بە نیسبەت ڕەوتی خاوی هەڵوەشانەوەی گەمارۆ ئابوورییەكان بەدژی ئێران سكاڵای بەرز كردەوەو گوتی شیركەتو بانكەكانی فەرانسە نابێ نیگەرانی ئەم دروشمانە بن كە بەربژێرانی هەڵبژاردنی سەركۆماریی ئامریكا بەدژی ئێران بەرزیان دەكەنەوەو لە ئەنجامی ئەم نیگەرانییانەدا سەبارەت بە هاوكارییەكانی خۆیان لەگەڵ كۆماری ئیسلامی تووشی شكو دوودڵی بن.
وەزیری دەرەوەی ئێران هەروەها كێشە بانكییەكانی بە یەكێك لە لەمپەرە سەرەكییەكانی بەردەم جێبەجێكرانی ڕێككەوتنە ئابوورییەكان زانی كە لە نێوان ئێرانو فەرانسەدا ئیمزا كراونو داوای كرد ئەم لەمپەرانە هەڵگیرێن.
كاربەدەستانی پلەبەرزی ڕێژیمی ئێران لە سەرووی هەمووانەوە عەلی خامنەیی، ڕێبەری كۆماری ئیسلامی دهڵێن كە بەهۆی گەمارۆ یەكلایەنەكانی ئامریكا بەدژی سپای پاسدارانی ئێران، بە كردەوە گەمارۆ نێودەوڵەتییەكانی سەر ئێران هەڵنەگیراون، چونكی لە ئەنجامی ئەم گەمارۆیانەدا شیركەتو بانكە ئورووپاییەكان لە هاوكاری كردن لەگەڵ ئێران دەترسێن.