شەهیندۆخت مەولاوێردی، جێگری سەركۆمار بۆ كاروباری ژنانو بنەماڵە دهڵێ ئاماری ئەم كۆرپانەی كە لە نێو زگی دایكیاندا فرۆشراون زۆر لە سەرێیهو هەژاری یەكێك لە سەرەكیترین هۆكارەكانی پەرەسەندنی ئەم دیاردە كۆمەڵایەتییە لە ئێرانە.
مەولاوێردی لە لێدوانێكدا بۆ هەواڵدەریی ئیلنا گوتوویەتی ئامارێكی وردو دەقیق لە بابەت فرۆشتنی كۆرپەكان لەنێو زگی دایكیاندا لەبەر دەستدا نییە، هەر ئەوەندە دەزانێ كە ئەم ئامارە یەكجار زۆرە.
ناوبراو “هەژاریی ئابووری”، “هەژاریی فەرهەنگی”، “ئیعتیاد” و “كارتۆن خەوی” بە گرینگترین هۆكارەكانی فرۆشتنی كۆرپە لە ئێران زانیوە.
فرۆشتنی كۆرپە لە ئێران دیاردەیەكی كۆمەڵایەتیی نوێیەو كۆمەڵێك لە بنەماڵەكان لە بەرامبەر وەرگرتنی چەند سهد ههزار تمهندا كۆرپەكانی خۆیان دەفرۆشن.
مانگی ڕەشەممەی ساڵی ڕابردوو سیاوەش شەهریوەر، بەڕێوەبەری گشتیی كاروباری كۆمەلایەتیو فەرهەنگیی پارێزگاریی تاران بەشێك لەم دیاردەی بە كارێكی سیستماتیکو پلان بۆداندراو لە قەڵەم دابوو. ئهو گوتبووی زۆرتر ژنانی موعتادن كە كۆرپەكانی خۆیان دەفرۆشن.
فاتمە دانیشوەر، سەرۆكی كۆمیتەی كۆمەڵایەتیی شوورای شاری تارانیش ڕۆژی ١٦ی خەزەڵوەری ساڵی ڕابردوو گوتبووی كۆمەڵێك لە ژنانی “كارتۆن خەو و لەشفرۆش” پاش منداڵبوون كۆرپەكانی خۆیان بە ١٠٠ تا ٢٠٠ هەزار تمەن دەفرۆشن.
دانیشوەر هەروەها گوتبووی ئەم كۆرپانە لە لایەن باندە جۆراوجۆرەكانو یهک لهوان باندهکانی سواڵكەری دەكڕدرێن.
