كۆبوونەوەی كۆمەڵیك لە كرێكارانی ڕستن‌و چنینی “شین بافت”ی سنە

ڕۆژی ڕابردوو بە دەیان كەس لە كرێكارانی كارخانەی ڕستن‌و چنینی “شین بافت” لە بەردەم ئیدارەی كاری سنە كۆبوونەوەو داوای گەڕانەوە بۆ سەر كارەكانیان كرد.
بەپێی ڕاپۆرتی كۆمیتەی هاوئاهەنگیی بۆ پێكهێنانی ڕێكخراوە كرێكارییەكان، كرێكارانی كارخانەی ڕستن‌و چنینی “شین بافت”ی سنە كە ماوەی ٦ مانگە لە لایەن خاوەن كارەوە لەسەر كارەكانیان دەركراون و بۆ وەرگرتنی بیمەش بە ڕێكخراوی بیمەیان ناساندبوویانن، پاش كۆتایی ئەم ماوەیە بە مەبەستی بەدواداچوونی بارودۆخی كارەكانیان لەبەر دەم ئیدارەی كار كۆ بوونەوە، بەڵام لە وڵامی ئەم دووایه‌دا، كاربەدەستانی ئەم ئیدارەیە ڕایانگەیاندوە كە خاوەن كار لە ناساندنی ئەم كرێكارانە بە بیمەی بێكاری، بە جۆرێك تووشی هەڵە بووەو دەبوایە كرێكارەكانی بۆ ماوەی ١٨ مانگ بە بیمەی بێكاری ناساندبا.
بەرپرسانی بیمەی بێكاری هەروەها ڕایانگەیاندوە كە نوێنەری خاوەنكار بە مەبەستی بەدواداچوونی كێشەی ئەم كرێكارانە هەوڵی پێویستی نەداوەو دەبێ گرفتی ئەوان لە كۆمیسیۆنی پارێزگا تاوتوێ بكرێ، ئەوە لە حاڵێك دایە كە كرێكارەكان دەڵێن خاوەنكار بەڵێنیی ئەوەی پێ دابوون كە پاش كۆتایی ماوەی بیمەی بێكاری، دووبارە دەگەڕێنەوە سەر كارەكانی خۆیان.
بەقسەی كرێكارانی كارخانەی ڕستن‌و چنینی شین بافت، ئەم كارخانەیە ئێستاش هەر خەریكی كارەو لە بەرهەمهێنانی خۆی بەردەوامەو ئەم فێڵەی خاوەنكاریش تەنیا لەبەر ئەوەیە كە ئەوان لە كارەكانیان دەربكا.
پێویست بە وەبیر هێنانەوەیە كاربەدەستانی ئیدارەی وەك دوایین وڵام بەم كرێكارانەی گوتووە :”ئەم هەمووە خەڵكە بێكارن، با ئێوەش وەك ئەوان كارتان نەبێ، مه‌گه‌ چی ده‌بێ.”