خۆپێشاندانی ناڕەزایەتیی كرێكاران و كاسبكارانی بازاڕ لە بابەت پێ نەدرانی مووچە و هەقدەستەكانیان و فشاری ماڵیات، لە زۆربەی شارەكانی كوردستان بەردەوامە.
بەپێی ڕاپۆرتی هەواڵدەریی كوردستان و كورد دووكاندارانی شارەكانی نەغەدە و ورمێ بە نیسبەت فشاری ماڵیاتی مانیان گرتووە و لە ماوەی حەوتووی ڕابردوودا لە بەردەم بینای پارێزگاری كۆ بوونەوە.
ئەم كاسبكارانە لە كۆبونەوەی خۆیاندا ڕایانگەیاندوە كە لە مانگی ڕەمەزاندا بارودۆخی بازاڕ زۆر کز و نالەبارەو داهاتی دووكاندارەكان لەم مانگەدا سیفر دەبێتەوە. لەم بارودۆخەشدا ئیدارەی ماڵیات فشاریان بۆ دێنێ و هەڕەشەیان لێ دەكا كە بێتوو ماڵیات نەدەن لەگەڵیان بەرەوڕوو دەبنەوە. ئەم كاسبكارانە پێداگرییان كردووە كە بێتوو فشاری ماڵیاتیان لەسەر لانەبەن، بە مەبەستی ناڕەزایەتی دەربڕین دووكانەكانیان دادەخەن.
لە لایەكی دیكەشەوە سەر لە بەیانیی ڕۆژی دووشەممە ٣١ی جۆزەردان كۆمەڵێك لە شۆفیرەكانی یەكەی ئوتوبووسڕانیی ئیلام، بە مەبەستی ناڕەزایەتی دەربڕین سەبارەت بە پێ نەدرانی مووچەی ٦ مانگی خۆیان لە بەردەم ڕێكخراوی ئوتوبووسڕانیی شیركەتی واحیدی ئیلام كۆبوونەوەیەكی ناڕەزایەتییان وەڕێ خستو داوای مافەكانی خۆیان كرد.
هەر لە هەمان ڕۆژدا كۆمەڵێك لە پێرسۆنێلی شیركەتی ئیدارەی وەرزشی ئیلام كە هەر كامیان ماوەی ٣ تا ٥ مانگە مووچەیان وەرنەگرتووە، لە شوێنی ئەم ئیدارەیە لە شەقامی حەیدەری، كۆبوونەوەو داوای وەرگرتنی مووچەی دواكەوتووی خۆیان كرد.
بەیانیی ڕۆژی یەكشەممەش، ٢٢ كەس لە كرێكارانی شیركەتیو گرێبەستی شیركەتی موخابراتی شاری ئیلام، بۆ نیشاندانی تووڕەییو ناڕەزایەتی لە هەمبەر وەرنەگرتنی مووچەی ٤ مانگ و حەقی پاداشی خۆیان لەبەردەم ناوەندی مخابرات لە شەقامی حەیدەری كۆبوونەوە و خوازیاری دەستەبەر كرانی مافەكانیان بوون.
لە كرماشانیش كۆمەڵێك لە ژینگەپارێزان بۆ ناڕەزایەتیی دەربڕین لە بابەت گرفتی ژینگەپارێزیی بەهۆی پیس بوونی كەش و هەواو خۆڵبارین لە بەردەم ئیدارەی ژینگەپارێزیی كرماشان لە بڵواری بەهەشتی خۆپێشاندانێكیان وەڕێ خست.
ئەم ژینگەپارێزانە وێڕای دەربڕینی ناڕەزایەتی لە بابەت خەمساردیی كاربەدەستانی حكوومەت بۆ چارەسەری قەیرانی پیس بوونی هەوا و خۆڵبارین، خوازیاری پێ ڕاگەیشتنی كاربەدەستان بەم گرفتە جیددییەی خەڵك بوون.