هاووڵاتییەكی كوردی خەڵكی پاوە لە هەوڵێكی سەمبولیكدا، بە لێدانی دەمامك لەسەر ڕوخساری پەیكەرەی “میرزا عەبدولقادر پاوەیی” ناڕەزایەتیی خۆی لە بابەت بارودۆخی پیسی هەوا و خۆڵبارین دەربڕی.
سەرهەڵدانی دیاردەی خۆڵبارین و بوونی تۆز و خۆڵ لە كەش و هەوای ڕۆژاوای ئێران لە ماوەی چەند ڕۆژی ڕابردوودا خەڵكی ڕۆژهەڵاتی كوردستانی بۆ جارێكی دیكەش تووشی گرفتێكی زۆر كردوە، بەڵام كاربەدەستانی پێوەندیدار و لە سەرووی هەمووانەوە سەرۆكی ڕێكخراوی ژینگەپارێزیی ڕایگەیاندووە سەرچاوەی ئەم تۆز و خۆڵە تەنیا وڵاتی عێراقە؛ کارناسانو رهخنهگرانی دهوڵهتیش دەڵێن چارەسەری كێشەی خۆڵبارین دوعا و پاڕانەوە نییە.
سەلام ئەمینی، نوێنەری ئیلام لە لێدوانێكدا بۆ هەواڵدەریی فارس گوتوویەتی سەرۆكی ڕێكخراوی ژینگەپارێزی تەنانەت بۆ دیتنی ئەم كێشەیە لە نزیكەوە نەتەنیا سەردانێكی ئەم ناوچەی نەكردووە بەڵكوو لەم ماوەیەدا تاقە ماسكێكیشیان بۆ ئەم خەڵكە نەناردوە تا خۆیانی پێ بپارێزن. بەڕای ناوبراو، خەڵك بەهۆی ئەم تۆز و خۆڵەوە لە مهینهتییهکی زۆردا دەژین و نابێ بە بیانووی ناسەقامگیر بوونی وڵاتانی ناوچە خۆیان لەم بەرپرسایەتییە بدزنەوە.
شایانی باسە كەمپەینی “خاك” لە ماوەی چەند حەوتووی ڕابردوودا لە لایەن هاووڵاتییانی كرماشانییەوە دامەزرا، ئەم كەمپەینە بە ٢١ هەزار لایەنگرەوە ئاواتەخوازە بتوانێ سەرنجی بەرپرسان بۆ لای چارەسەری ئەم گرفتە ڕابكێشێ و کاربهدهستانی دهوڵهت لهوه تێ بگهیهنێ كە “ئێران تەنیا تاران نییە و ئەم ڕۆژانە كوردستان و خووزستان زۆر بە سهختی هەناسە دەدەن.”
