كامكارەكان: بەبێ به‌شداریی سەبا، قەشەنگ و هانا هیچ كۆنسێرت بەڕێوە نابەین

هووشەنگ كامكار، یەكێك لە ئەندامانی شوورای بەرزی ماڵی مووسیقیی ئێران و سەرپەرستی گرووپی مووسیقیی كامكارەكان پێداگری كردەوە كە ئەم گرووپە مووسیقییە، بەهیچ شێوەیەك بەبێ به‌شداریی ژنه‌ ژەنیاره‌کان و هادەنگە ژنەكان، كۆنسێرت بەڕێوە نابەن.
ناوبراو لە لێدوانێكدا بۆ كاناڵی هەواڵی فەرهەنگ و هونەر، گرفتی گرووپی كامكارەكانی بۆ بەڕێوەبردنی كۆنسێرت لە شارە جۆربەجۆرەكانی ئێران بەم جۆرە باس كرد و گوتی: كێشەی ئێمە ئەوەیە كە ئەگەر ڕێكخراوەكانی شاری ئیسفەهان بیانەوێ ١ میلیارد دۆلاریش بە كامكارەكان بدەن‌و بڵێن وەرن كۆنسێرت بەڕێوە ببەن، ئێمە ئامادە نابین بێ سەبا و قەشەنگ و هانا بچینه‌ سه‌ر شانۆ. ئێمە خاتوونی ژەنیارمان هەیە، خاتوونی هاودەنگمان هەیەو هەر بۆیە هیچكات ڕێگە بەخۆمان نادەین ئەم ئازیزانە لە سەر سێن بێنینە خوارێ و بڵێین ئێوە مەچنەوە سەرێ با ئێمە پووڵه‌کەمان لە كیس نەچێ.”
سەرپەرستی گرووپی مووسیقیی كامكارەكان لە درێژەی قسەكانی‌دا گوتی: ” لە هەر جێیەك توانیمان لەگەڵ ئەندامانی گرووپەكەمان كۆنسێرت بەڕێوە دەبەین، ئەگەر نەیانهێشتین ئەوە ئێمەش كۆنسێرتمان نابێ، ئیدی بەم خاتوونانە ناڵێین ئێوە لە سێن وەرنە خوارێ. چونكە ئەوە گەورترین سووكایەتییە كە هونەرمەندێك بە ئەو گرووپەی دەكا.”
هووشەنگ كامكار هەروەها بۆ ناڕەزایەتی دەربڕین بە نیسبەت ئەم هونەرمەندانەی كە بە مەبەستی بەڕێوەبردنی كۆنسێرتەكانیان ملكەچی مەرجی لەم چەشنە دەبن، سەركۆنەی كردن و گوتی: من نامهەوێ ناوی هیچكەس بێنم. ئیدیعاش دەكەن كە كەسانێكی هونەردۆست و هونەرمەندن. باشە كۆنسێرت بەڕێوە مەبە، ئەو پەڕەكەی ٢٠ میلیۆن تمەن زەرە دەكەی، ئیدی خۆ كفر نییە.”