كاربەدەستێكی پلەی بەرزی ههرێمی كوردستان دەڵێ پاش ئەوەی شكستمان بە داعش هێنا، عێراق دەبێ بهسهر سێ ههرێمی شیعە، سوننی و كورد دابەش بكرێ تا كۆتایی بەم شەڕو نێوان ناخۆشییانە بێ.
مەسروور بارزانی سەرۆكی دهزگای پاراستنی هەرێمی كوردستان دەڵێ بێ متمانەیی نێوان حیزبەكان و هێزە سیاسییەكانی عێراق تا ئەو ئاسته پهرهی سهندوه كە عێراقییەكان ناتوانن پێكەوە لە ژێر یەك میچدا بژین.
مەسروو بارزانی لە وتووێژێكدا بە هەواڵدەریی ڕۆیتێرزی ڕاگەیاند كە فیدرالیزم لە عێراق هیچ ئاكامێکی نەبوو، هەر بۆیە دەبێ بەرەو كۆنفیدارلی هەنگاو بنێین یان سەربەخۆیی. ئهو دهڵێ ئەگەر 3 وڵاتی كۆنفیدراڵمان هەبێ، 3 پێتەختی یەكسانمان دەبێ كە هیچكامیان لەوی دیكە لەسەرتر نابێ و بە یەكسانی دەژین.
مەسروور بارزانی لە حاڵێكدا ئەم قسانەی دەكرد كە كوردانی ئەم وڵاتە چەند هەنگاوێكیان بەرەو سەربەخۆیی هەڵێناوەتەوە. كوردانی هەرێمی كوردستان دەوڵەتی خۆبەڕێوەبەریان هەیە و هێزی پێشمەرگەشیان هەیە. هێزی پێشمەرگە ئێستا خەریكن لەگەڵ داعش بە پشتیوانیی ئامریكا و هاوپەیمانان شەڕ دەكەن.
پێشتر مەسعوود بارزانی داوایریفراندۆم بۆ سەربەخۆیی کردبوو، ئەمە لە حاڵێكدایە كە هەرێمی كوردستان لەگەڵ دەوڵەتی ناوەندی لەسەر مەسەلەی نهوتو ئابووری كێشەیان هەیە.
دەوڵەتی ناوەندیی عێراق، بوودجەی دیاریكراوی هەرێمی كوردستانی ڕاگرتووە تا ئەم هەرێمە ناچار بكا كە فرۆشتنی نەوت لە ژێر كۆنتڕۆڵی دەوڵەتی ناوەندی بنێتەوە.