عەلی ڕەبیعی، وەزیری كاری دەوڵەتی ڕووحانی لە كۆبوونەوەی ئاشكرای مەجلیسی شوورای ئیسلامیدا، لە بابەت وڵامدەر نەبوونی ئابووریی دەوڵەتی بۆ چارەسەری بێكاری لەم وڵاتەو هەروەها كەسریی لە ڕادەبەدەری سندووقەكانی دابینكردنی كۆمەڵایەتی، لایەنە پێوەندیدارەكانی وریا كردەوە.
وەزیری كار پێداگری كردەوە كە دەوڵەت سەرچاوەی پێویستی بۆ سەرمایەدانان لە بەر دەستدا نەماوە و هۆی لێدانی هەزاران بەنداوی نیوهچڵ و پرۆژەی جۆراوجۆری ئاوەدان كردنەوە، گەلێك قەیرانی دیكەی ئەم كۆمەڵگایە وەك قەیرانەكانی ئاو و ڕەخساندنی هەلی كار چارەسەر نەكراونو قەتیش چارەسەر ناكرێن.
بە قسەی عەلی ڕەبیعی لە هێندێك ناوچەی ئەم وڵاتە مەودای نێوان دەرچووانی زانكۆكانو هەلی كار تەنانەت سەدی چواریش تێپەڕ ناكا. ڕەبیعی هێزی كاری ئێرانی بە كۆنتڕۆڵ نەكراو و بێبەش لە ستانداردە پێویستەكان لە قەڵەم دا.
عەلی ڕەبیعی ڕوو بە نوێنەرانی مەجلیسی دەیەم پێداگری كردەوە كە تەنانەت گەشەی ئابووریش بە تەنیا نابێتە هۆی پێكهاتنی كارو شوغڵ و پەرەسەندنی عهداڵەتی لێ ناكەوێتەوە.
ناوبراو لە بەشێكی دیكەی قسەكانیدا ئاماژەی بە ئاستەنگە ماڵییەكانی سندووقەكانی خانەنشینیو دابینكردنی كۆمەڵایەتی كرد و گوتی: سەرجەم كەسریی سندووقەكانی خانەنشینیو بیمەكان تا كۆتایی ساڵی ٩٤ زیاتر لە ٣٦ هەزار میلیارد تمەن بووه، هەرچەند بەپێی داننانی وەزیری كار كەسریی ئەم سنووقانە زۆر لەوە زیاترە كە لە بوودجەی ساڵانەدا پەسند نەكراون.