جێگری بەرەنگاربوونەوە لەگەڵ بڵاوكرانەوەو كاروباری نێودەوڵەتیی ستادی بەربەرەكانی لەگەڵ مادە هۆشبەرەكان باسی لە دەستنیشانكرانی ٤٢ هەزار موعتادی كارتۆن خەوی ئاشكرا لە ئێران كرد.
ئەسەدوڵڵا هادینژاد لە كۆبوونەوەی شوورای هاوئاهەنگی لەگەڵ ستادی بەربەرەكانی لەگەڵ مادە هۆشبەرەكانی پارێزگای سنە، گوتی: لە نێو ٤٢ هەزار موعتادی كارتۆن خەو و بێ ماڵو حاڵ كە دەستنیشان كراون، ١٥ هەزار كەسیان لە تارانو ئەوانی دیكە لە پارێزگا جۆربەجۆرەكانی ئێران دەژین.
ناوبراو وێڕای ئاماژە بەم بابەتە كە لە نێو موعتادەكانی تاراندا، ٦ هەزار كەسیان بەهۆی تەواو ئالوودەبوونیان بە ئیعتیاد بۆ ئەوەی نابن كە بگەڕێنەوە نێو بنەماڵەكانیان، گوتی: لەنێو ئەم موعتادانەی لە تاران كۆیان كردوونەتەوە، هەزار كەسیان ژن بوون كە لە نێو ئەم ژنە موعتادانەشدا ٧٠٠ كەسیان بێ كەس و بێ ماڵ و حاڵ بوون.
ئەسەدوڵڵا هادی نژاد لە درێژەی قسەكانیدا گوتی: ئەم ٤٢ هەزار موعتادە كارتۆن خەوەی كە دەستنیشان كراون جیا لەم كەسانەن كە تا ئێستاش ڕۆژیان بەو ڕۆژە نەگەیشتووە و لە كەمپەكانی وازهێنانی ئیعتیاد یان لە ماڵ و شوێنی كاری خۆیانن.
ناوبراو لە درێژەی قسەكانیدا وێڕای ئاماژە بە ڕێژەی ئەم مادە هۆشبەرانەی كە لە ساڵی ٩٤ دەستیان بەسەردا گیراوە، گوتی: ساڵی ڕابردوو لە پارێزگا جیاجیاكانی ئێران سەرجەم دەستیان بەسەر ٦١٨ تۆن لە جۆرەكانی مادەی هۆشبەر داگرت كە ئەم ڕێژەیە لەچاو ساڵی پێشتر تا ئاستی سەدی ١٢ زیادی كردبوو.