نوێنەری خەڵكی سنە، دیواندەرە و كامیاران لە مەجلیسی شوورای ئیسلامی وێڕای دانە بەر ڕەخنەی كەلك وەرنەگرتن لە هێزی خۆجێیی لە پارێزگای سنە، گوتی: ئێمە نیگەرانی ئەوەین كە چاپەزی ئیدارەكانی شارەكانی كوردستانیش لە پارێزگاكانی دیكەڕا بێنن.
سەید ئەحسەن عەلەوی لە كۆبوونەوەی ئاشكرای مەجلیس ڕوو بە وەزیری پەروەردەو بارهێنان، وێڕای دانە بەر ڕەخنەی بارودۆخی فەرهەنگییان گوتی: مامۆستاكان بە كەمترین مووچەو لە خراپترین بارودۆخدا دەژین کەچی سووكە ئاوڕێكیان لێ نادرێتەوە تا ئەو جێگایەی كە لە ماوەی كەمتر لە ساڵێكدا خانەنشین كراوەكانی پەروەردە و بارهێنان نەیانتوانیوە پاداشتی كۆتایی خزمەتی خۆیان وەربگرن و شەرمەزاری ماڵ و منداڵەكانیان بوون.
عەلەوی پێداگری لەسەر پێویستیی ڕوونبوونەوەی چارەنووسی گرێبەستی مامۆستاكانی پارێزگای سنە كردو گوتی ئەم پارێزگایە تەنیا پارێزگایەكە كە بارودۆخی دامەزراوەکانی لەو پێوەندییەدا ڕوون نەبۆتەوە.
ناوبراو لە بەشێكی دیكەی قسەكانیدا ڕەخنەی لە نەهاتنە دیی وادە و بەڵێنییەكانی سەركۆماری لە پارێزگای سنە گرت و گوتی: سەرەڕای تێپەڕینی زیاتر لە ٣ ساڵ بەسەر تەمەنی دەوڵەتی یازدەیەم تا ئێستاش ئەم بەڵێنییانە هەر لە چوارچێوەی قسەدا ماونەتەوە و ئەمڕۆكە كوردستان هەڵاواردن، ناعیداڵەتی، بێكاری، هەژاری و دواكەوتوویی لەڕادەبەدەر نەبێ چی دیكەی بەخۆیەوە نەبینیوە.
نوێنەری خەڵكی سنە، دیواندەرە و كامیاران لە مەجلیس وێڕای دانە بەر ڕەخنەی دانەمەزراندنی هێزی خۆجێیی لە كوردستان، گوتی: هەر ئەوە ماوە تەنانەت چاپەزەكانیش لە پارێزگاكانی دیكەڕا بێنن.