به‌ڕێوه‌چوونی چەندین ناڕەزایەتی‌و مانگرتن لە شارەكانی ئیلام، پاوە، كرماشان‌و سنە

ڕۆژی یەكشەممە 23ی جۆزەردان چەندین كۆبوونەوەی ناڕەزایەتی‌و مانگرتنی كرێكاران، كارمەندان‌و چین و توێژەكانی دیكە لە شارەكانی پاوە، كرماشان و سنە بەڕێوەچوو.
كۆبوونەوەی ناڕەزایەتیی كۆمەڵێك لە كارمەندانی شیركەتی و گرێبەستی شیركەتی دابەشكردنی بەرق بە هۆی پێنەدانی مووچەی ٣ تا ٥مانگ بەڕێوەچوو. ئەم كۆبوونەوەیە لە شوێنی شیركەتی دابەشكردنی بەرق لە بڵواری بە ناو “مودەرێس” بوو و ناڕازییان داوای مووچەی دواكەوتووی خۆیان كرد.
كۆبوونەوەی كۆمەڵێك لە كارمەندانی گرێبەستی ئیدارەی فەرهەنگ و ئیرشادی ئیسلامیی پاوەش بە هۆی پێنەدانی مووچەی دوو مانگ لەم ئیدارەیە لەسەر شەقامی بە ناو “شۆهەدا”بەڕێوەچوو و ئه‌وانیش خوازیاری مووچەی دواكەوتوو خۆیان بوون.
گرووپێك لە كارمەندان و كرێكارانی شیركەتی سەرمایەگوزاری ئاوەدانكردنەوە و سەنایەعی زاگرۆسیش كە هەموو جۆرەكانی نان قەندی و كەیك و كلوچە دروست دەكا، بە هۆی پێنەدانی بیمەی دابینكردنی كۆمەڵایەتی یەك ساڵ و هەروەها دواكەوتنی مووچەی ٤ مانگ لەم كارخانەیە لە شارۆچكەی پیشەسازیی بێستون، فازی ٣ كۆبوونەوە و داواكارییەكانیان هێنایە گۆڕێ.
كۆبوونەوەی كۆمەڵێكی دیكە لە كارمەندانی شیركەتی ناوەندی بێهداشت و دەرمانی “ئیمام محەممەد فەخری ڕازای” بە هۆی وەرنەگرتنی ٦ مانگ زیادەكاری لە شوێنی كارەكەیان لە شەقامی حاجی ئاباد كۆبوونەوە. بەرپرسانی ڕێژیم لە جیاتی ئەوەی كە وەڵامی داواكارییەكانیان بدەنەوە، پێیان ڕاگەیاندن كە ئەم بابەتە بۆ زانكۆی پزیشكیی سنە دەنێرین.
هێندێك لە خورادنگەكانی كرماشانیش بە هۆی داخرانی دوكانەكانیان بە بیانووی ئەوەی كە لە مانگی ڕەمەزاندا نابێ هیچ بفرۆشن لە بەردەم ئیدارەی تەعزیرات لە مەیدانی بە ناو “كشوەری” كۆبوونەوەی ناڕەزایەتییان بەڕێوە برد و خوازیاری پێڕاگەیشتن بە گیروگرفت و كرانەوەی پلۆمپی دوكانەكانیان بوون.
ئەم كەسانە لە لایەن یەكیەتیی سێنفی خۆیان، مۆڵەتی فرۆشتنیان پێدراوە بەڵام لە شوێنی ئیدارەی تەعزیرات هیچ كام لە كاربەدەستانی ڕێژیمی وەڵامدەری گیروگرفتی ناڕازییان نەبوون.